O grupo de En Marea no Congreso propón que este órgano se constitúa como auténtica comisión de cooperación institucional permanente.
Iniciativa:https://gallery.mailchimp.com/124110c5c4ca02bed7d557215/files/48fc30de-8e1e-47c6-92d7-ef4fd292c93d/20180716132242939.pdf
Madrid, 16 de xullo de 2018. O grupo parlamentario de En Marea no Congreso vén de rexistrar na Cámara Baixa unha Proposición non de Lei para o seu debate na recentemente creada Comisión de Política Territorial e Función Pública, instando ao Goberno a activar a ‘Comisión Bilateral de Cooperación Administración Xeral do Estado-Comunidade Autónoma de Galicia’, coa finalidade de que funcione como un instrumento de intercambio de informacións, negociacións e acordos para dar resposta ás necesidades da cidadanía galega e do contido do Estatuto de Galicia, de xeito que se constitúa nunha auténtica comisión de cooperación institucional permanente que desenvolva un plan de traballo que dea curso ao traspaso de competencias das materias pendentes así como ao conxunto de asuntos da axenda pública galega.
Hai máis de 10 anos que o Goberno central non transfire ningunha nova competencia a Galicia – denunciou a deputada Yolanda Díaz – xa que os últimos gobernos do Partido Popular e do PSOE deron as costas ás demandas urxentes e históricas da sociedade galega como son, por exemplo, a transferencia da autoestrada AP-9, a competencia en materia de tráfico ou en salvamento marítimo, entre outras.
En Marea lembra que o artigo 150.2 da Constitución posibilita que o Estado transfira ou delegue nas comunidades autónomas facultades correspondentes a materias de titularidade estatal que sexan, pola súa propia natureza, susceptibles de transferencia ou delegación.
O Estatuto de autonomía de Galicia, pola súa banda, contempla esta posibilidade no seu artigo 36.1, outorgando ao Parlamento, no seu artigo 36.2, a competencia para formular estas solicitudes e determinar o organismo da Comunidade Autónoma ao que se atribúa a competencia transferida ou delegada.
Así, consideramos que “é necesaria a convocatoria desta Comisión”, – destacou a deputada Yolanda Díaz – e que “se fixe un plan de traballo para que ambas as dúas Administracións establezan as prioridades e recollan as demandas da sociedade galega, que nestes momentos céntranse, como indicamos, na urxente transferencia de varias competencias a Galicia, que deben ser ampliadas a novas necesidades que camiñen pola senda do avance do autogoberno de Galicia como nación”.
A deputada lembra que varias das competencias demandadas pola sociedade galega “xa foron aprobadas por unanimidade non Parlamento de Galicia, ademais de mencionada transferencia da autoestrada AP-9, ou lexislativo galego tamén esixiu a transferencia en materia de Tráfico e Seguridade Viaria, iniciativa freada no Congreso dos Deputados (ao igual que a AP-9), e que teñen asumidas Comunidades como Euskadi e Catalunya. Tamén se aprobou no Parlamento de Galicia, este pasado mes de abril, solicitar ao Goberno o traspaso das competencias dos centros do Instituto Español de Oceanografía (IEO). Finalmente, son demandas da sociedade galega a transferencia da sanidade das institucións penitenciarias ou das competencias en salvamento marítimo entre outras.
Así, e segundo sinalan na Proposición non de Lei as deputadas e deputados de en Marea o Executivo galego é a Institución autorizada para concretar e xestionar as solicitudes de transferencia, dando curso ao conxunto das demandas das institucións e da cidadanía galega, polo que a Comisión Bilateral debe asumir tamén como obxectivo a eliminación dos obstáculos ao desenvolvemento do noso autogoberno, incluidos os numerosos recursos ante o Tribunal Constitucional interpostos polo goberno central.