O portavoz de En Marea no Congreso, Miguel Anxo Fernán Vello, quer saber se Costas fixo algún estudo sobre a inestabilidade da estrutura pétrea deste espazo e se se plantexa o peche ao tránsito de xeito definitivo.
Madrid, 21 de maio 2018. O portavoz de En Marea no Congreso, Miguel Anxo Fernán Vello, presentou varias preguntas dirixidas ao Ministerio de Medio Ambiente para saber cal é a súa posición sobre a posibilidade de pechar de xeito definitivo ao tránsito as zonas de covas, grutas e corredores do espazo de As Catedrais (Ribadeo, Lugo).
“Pode o Ministerio aportar información sobre a reunión celebrada a mediados de maio en Lugo sobre a situación do areal e do espazo de As Catedrais na que participaron todas as administracións? Cales son as conclusións? Cal é a postura do Ministerio de pechar o acceso ás zonas máis sensíbeis? Non que se trataría dunha medida preventiva a considerar?”, son algunhas das cuestións que dirixe a Tejerina.
Que medidas se van adoptar para garantir a seguridade dos visitantes?
Fernán Vello xa presentara unha iniciativa parlamentar con motivo do accidente mortal que se cobrou a vida dunha moza nos días festivos de Pascua debido ao desprendimento de rochas. “Esta área de grande valor xeolóxico é un lugar moi visitado, sobre todo nos últimos tempos nos que experimentou unha grande masificación que obrigou a establecer máximos de visitantes. En ocasións anteriores xa se fixeran advertencias pola existen de áreas de derrube nos acantilados”, explica o deputado de En Marea.
Pregunta ao Ministerio pola xunta celebrada en lugo na que se analizou o estudo preliminar no que se recomenda evitar o tránsito polas covas e áreas de grutas. “Segundo as informacións, a medida sería temporal á espera das conclusións, pero interésanos coñecer a postura do Ministerio sobre as medidas a adoptar para evitar máis accidentes”.
“Realizou Costas estudos e análises sobre a inestabilidade da estrutura pétrea deste espazo? De ser así, qué medidas plantexa?”, pregunta o portavoz de En Marea.