Madrid, 24 de agosto de 2018. Os Grupos Parlamentarios Socialista, de Unidos Podemos-En Comú Podem-En Marea, de Esquerra Republicana de Catalunya, así como os deputados de Compromís no Congreso dos Deputados, rexistraron na mañá deste venres unha Proposición de Lei co propósito de acabar coa anormalidade normativa e parlamentaria que supón a capacidade de bloqueo que a vixente Lei Orgánica de Estabilidade Orzamentaria outorga ao Senado na fixación dos obxectivos de estabilidade.
“A Proposición de Lei rexistrada no día de hoxe pretende volver á situación anterior á promulgación da Lei Orgánica de Estabilidade Orzamentaria impulsada polo Goberno do Partido Popular no ano 2012”, explica o voceiro de En Marea no Congreso, Antón Gómez-Reino, e a deputada Yolanda Díaz.
Esta Lei proporciona á maioría do PP no Senado a capacidade anómala de vetar as decisións adoptadas pola maioría dos representantes da cidadanía española no Congreso dos Deputados en torno ás contas públicas.
Coa proposta rexistrada hoxe restitúese a normalidade no procedemento lexislativo que establece a Constitución Española, posibilitando ao Congreso, sede da soberanía popular, adoptar as decisións definitivas, tal e como ocorre co resto da lexislación.
Resulta un contrasentido inaceptable que a Lei de Estabilidade Orzamentaria estableza unhas condicións de apoio parlamentario máis restrictivas que as previstas para a aprobación da propia Lei de Orzamentos Xerais do Estado, en cuxo procedemento non existe o veto senatorial.
“Non resulta lóxico que o PP, con pouco máis do 30% dos votos, manteña unha capacidade de veto e de bloqueo cara ás decisións que poidan adoptar a maioría da representación da cidadanía española no Congreso”, sinalou Gómez-Reino.
“Con esta reforma legal supérase o veto anormal do Senado e ábrese a posibilidade para establecer uns obxectivos de estabilidade orzamentaria compatibles con mellorar o benestar do conxunto da sociedade”, asegura a deputada Yolanda Díaz.
Ademais, esta reforma posibilita a negociación e posterior aprobación duns orzamentos xerais do Estado, que revirtan os recortes aplicados polos gobernos do PP durante os seis últimos anos e que proporcionen un desenvolvemento máis sólido, máis equitativo e máis xusto para o próximo exercicio orzamentario.
Os Grupos firmantes suscitan a tramitación desta Proposición de Lei mediante o procedemento de urxencia e por lectura única, a fin de dar a maior celeridad posible á súa aprobación. En Marea e o resto de Grupos firmantes contan xa co apoio explícito da maioría dos deputados e deputadas do Congreso.