Madrid, 10 de outubro 2018. Esta tarde comparecía na Comisión de Investigación do Alvia, Jaime Tamarit, ex Director do Laboratorio de Interoperabilidad Ferroviaria do CEDEX, experto en ERTMS, e que afirmou con rotundidade que “se tivera estado en servizo o ERTMS este accidente nunca tería ocurrido”.
Tamarit, que traballou no mesmo ámbito que as dúas anteriores expertas en ERTMS, Beatriz Sierra e Alejandra Pérez, non tivo reparos en facer unha afirmación tan clara, algo que evitaron en todo momento as expertas mencionadas. Tamarit si se preocupou de ler o Informe da CIAF do que dixo que “non apunta ás causas subxacentes”.
Fernández formuloulle unha serie de preguntas relativas á seguridade e ao feito de que se modificase o proxecto orixinal. “Cre vostede que esa desconexión foi un cambio signficativo que disminuiu a seguridade da circulación e que requeriría unha análise e avaliación de riscos?”. Tamarit foi tallante: “Por suposto, ao suprimir o ERTMS suprimiuse a transición e circulouse a 200 km por hora cando tiña que ter sido avaliada”.
A deputada de En Marea lembroulle a comparecencia de Beatriz Sierra, tamén experta en ERTMS, e que “ante a pregunta de se o ERTMS tivese estado operativo nunca tería pasado o tren a máis de 80 km por hora, foi incapaz de respostar e incluso dixo que “unha liña que non esté equipada con ningún sistema, tamén pode ser unha líña segura”. Que opina destas afirmacións?”, preguntou Fernández a Tamarit.
O ex Director do CEDEX asegurou que viu esa comparecencia e cre que “a xente ten medo”. Tamén puxo en cuestión os argumentos de Adif e Renfe de xustificar ter desconectado o ERTMS porque daba erros, deixando claro que era mellor que dese erros a escoller apágalo.
Fernández concordou co comparecente en que o Informe da CIAF non contén as causas subxacentes como obriga a normativa. “Opina que o presidente de CIAF debería reabrir a investigación sobre o accidente?”. Tamarit sinalou ao respeito que “desde o meu punto de vista, eu analizaría”.
A deputada de En Marea lembrou asemade que “cinco anos despois do sinistro, a liña onde se produciu o accidente segue sen ter o ERTMS operativo”.
Pilar Calvo: “Ao maquinista débíaselle poñer elementos, o único que tiña era un Libro Horario con erratas”
En segundo lugar, esta tarde compareceu Pilar Calvo Holgado, Directora de Investigación e Proxectos ESM do Instituto de Investigación de Seguridade e Factores Humanos. Fernández recolleu unha afirmación realizada na súa intervención sobre o Informe da CIAF, “dixo que non estaba dacordo co Informe. Se a CIAF debe facer conclusións en base á normativa e non o fai, está a facer deixación de funcións? Non cre que o Presidente da CIAF non está a cumprir coas súas funcións?”.
Pilar Calvo afirmou que “ten que aplicar determinados procedementos, e a aplicación deses procedementos ten que implicar os aspeitos organizativos. Coincido co Informe da ERA. Debe haber un cambio no xeito de facer a investigación porque debe irse ás causas subxacentes. O erro humano é un síntoma”.
A deputada de En Marea preguntoulle se cre que o maquinista foi culpable. Calvo dixo que “o comportamento do maquinista foi unha consecuencia. A situación sobrepasaba as capacidades humanas”.
Fernández: “Cando recibiu a chamada do interventor fixo deixación de funcións?”. Calvo respostou: “En absoluto. Ten a obriga de contestar. Desde o meu punto de vistas o maquinista non tivo ningunha responsabilidade. Obrou como calquera o tería feito nesas circunstancias”.
Alexandra Fernández aludiu a que “incluso algún informe sobre o accidente o recolle, en relación á perda de consciencia situacional do maquinista. Que elementos posibilitan a consciencia situacional ou a perda de mesma?”.
A experta en factores humanos sinalou que “ao maquinista débenselle poñer elementos visuais e auditivos que digan o que teñen que facer” e engadiu que “o único soporte que tiña era un Libro Horario que contiña erratas”.