A modificación do Código Penal prevé unha rebaixa da condena a menos de dous anos.
En Marea segue a esixir o indulto para estes dous traballadores e califican de inxusta esta condena.
Vigo, 2 de marzo de 2018. O Goberno ven de enviar resposta á deputada de En Marea, Yolanda Díaz, en relación á solicitude de indulto dos traballadores Carlos Rivas e Serafín Rodríguez, condenados a tres anos de prisión por participar nun piquete dunha folga provincial do transporte, en Pontevedra, no ano 2008.
Segundo a resposta ofrecida polo executivo, “coa modificación do Código Penal no ano 2015, posterior á condena destes dous traballadores, a nova pena mínima prevista reduciuse de 3 anos e un día de prisión, que fora a imposta, a 1 ano e 9 meses de prisión ou pena de multa de 18 a 24 meses”. A deputada de En Marea sinala que aínda que é unha boa nova, xa que ao carecer de antecendentes penais, os dous traballadores non se verían na obriga de entrar no cárcere, a condena segue a ser inxusta, toda vez que foron condenados sen que existise unha denuncia contra eles nin que se constatasen danos materiais nin personais. Por este motivo, En Marea seguirá a esixir o indulto para estes dous traballadores, nas rúas e nas institucións.
No relativo á resolución da petición de indulto, e que debera resolver o Consello de Ministros, o Goberno sinala que con arranxo ao disposto no artigo 6.1 do Real Decreto 1879/1994, de 16 de setembro, “os procedementos aos que dea lugar o exercicio do dereito de gracia deberán de ser resoltos no prazo máximo dun ano, podendo entenderse desestimadas as solicitudes cando non teña caído resolución expresa no prazo indicado”.